ለቅሶህም ለቅሶዬ ነው ! ======//========

መግቢያ፡ በየሣምንቱ ቅዳሜ በንቃት ከማዳምጣቸው የሬዲዮ አገልግሎት ሥርጭቶች አንዱና ዋነኛው በሻለቃ አብረሃም ታከለ አዘጋጅነትና አቅራቢነት የሚሰራጨውን የሠራዊቱ ድምፅ ነው ። ለምን ? ይህ ሬዲዮ የእኔና እኔን የመሰሉ የቀድሞው ሠራዊት አባል ልጆች ድምፅም ጭምር በመሆኑ ነው። ስለ ሠራዊቱም መስዋዕትነትና ተጋድሎ ሆነ ስለ ቤተሰቡ ሁኔታ በተጨባጭ ይናገራል። ሥርጭቱን ያላዳመጥኩበት ጊዜ የለም ብል አዘጋጁ ሊኮንነኝ ይችላል ። እ አ አ በወርሃ ጥቅምት መጀመሪያው ሣምንት 2014 እኔም የሬዲዮኑ የሠራዊቱ ቤተሰብ እንግዳ ሆኜ ቃለ መጠይቅ ሰጥቻለሁና ።

በጥር ፳ ቀን፳፻፱ ዓም አዘጋጁ ያቀረበው የቀድሞ ሠራዊት ቤተሰብ ልጅ የባሻው ግርማ ልጅ አቶ ታደሠ በቃለ መጠይቁ ወቅት ይሰጥ የነበረው በሳግና በለቅሶ የታጀበ መልስ ግን የሚያዳምጠውን በሙሉ መንፈስ የሚረብሽ ስለመሆኑ ለአፍታ አልጠራጠርም ። ምንአልባትም በዓለማችን ማን ያውቃል በሬዲዮን የቃለ ምልልስ ወቅት በረዠሙ የፈሰሱ እንባዎችና ሳግ የተቀላቀለባቸው ሊሆኑ ይችላሉ ። መቼስ ሰው ነኝና እኔም ተከፋሁ ተረበሹኩኝ ። ቀጥታ ላፕ ቶፑን ከፈትኩና በደሉን በቃላት ልጋራው ብዬ ይህችን የግጥም ስንኝ በችኮላም ቢሆን ደረደርኩኝ። ገና ጆሮ አይሰማው የለ ! ስንት በደል ፤ስንት ግፍ ፤ ስንት ጭካኔ ! ዕድሜ ይስጠን ብቻ !

እንጉርጉሮ !

=======

ሳግም ሲቃ ይዞን ፤ ዛሬም እናለቅሳለን

ክብርና ማዕረጉን፤ በባለቀኖቹ ለተገፈፈብን

ለቀድሞው ሠራዊት ፤ ወድቆ ለቀረብን

ማንም ያልደፈረው ፤ መከላከያችን

ድንበሩን ጠብቆ ፤ አጥሩን አጥብቆ

ባዕድ ጠላቶቹን ፤ በንቃት ጠብቆ

የኖረው ሠራዊት ፤ ተከብሮ ተደንቆ

ምስቅልቅሉ ወጣ ፤ ጥላሸት ተቀብቶ

በአገር አፍራሾቹ ፤ በመሰሪዎቹ ፤እንዳይሆን ተንቆ ።

ሻምበል ሥራ በቃ ፤ ወቴ ብላ ጠጣ

ግዳጅ ሊፈጽም ነው ፤ ሠራዊቱ መጣ።

ብለን እንዳልጨፈርን ፤ በሜዳ ጨዋታ

ቀውሱን ተጋራነው ፤ ልጆቹም በተርታ።

ሃዘን አኮራምቶን፤ ተርበን ታርዘን

መኖሪያ ቤት አጥተን፤ ቀያችንን ትተን

በደል ሲበዛብን ፤ ኑሮው ምርር ሲለን

ተበታትነን ቀረን፤ ልጅነት ሳያምረን

ሥራ ሠርተን መኖር፤ መታገል ጀመርን

አሳዳጊ አጥተን ፤ የሚንከባከበን 

ተስፋችን ጨልሞ ፤ በልጅነታችን

ኑሮውን ገፋነው ፤ እንዳይሆኑ ሆነን።

አይዟችሁ እደጉ ፤ ግቡ ትምህርታችሁ

የነገዋ ኢትዮጵያ ፤ ተስፋ ልጆች ናችሁ።

የሚለን ሰው ጠፍቶ ፤ የሚያበረታታን

ኖርናት ስናለቅስ ፤ የልጅ ዕንባ አፍሰን

ሳናየው በናፍቆት ፤ ፎቶ ብቻ እያየን

ወታደሩ አባባን ፤ የኛው መመኪያችን

ለሃገሩ ግዳጅ ፤ በሞት ለተለየን

የወደቀበትን ፤ መቃብሩን እንኳን

ሳናውቅ እ ን ኖ ራ ለ ን !

ወታደሩ አባባ ፤ እንወድሃለን፤ እንዘክርሃለን !

መታሰቢያነቱ ለሁሉም የቀድሞው መከላከያ ሠራዊትና የፖሊስ ሠራዊት አባላትና ቤተሰቦቻቸው ይሁን !

ሠሎሞን ታምሩ ዓየለ

ጥር ፳ ቀን ፳፻፱ ዓም